Verkehr

...now browsing by tag

 
 

Let’s talk about Traffic Part II

Donnerstag, Mai 6th, 2010

Jetzt gitts do sone Phänomen vo dr Neuzyt wo erscht sitt öppe 6 Joor do im Land iigsetzt wird. Strosseample. Isch jo nid s’dümmste, aber irgendwie passts au absolut nid in die Verkehrsstrategie iine. Uff alli fäll sind si do, wärde sogar zu öppe 60% respektiert. Jedi Ample hett e Countdown wos aazeigt, wievill sekunde sno goot bis zum Farbewäggsel. Halti bi emne Rotliecht aa und gse 05, denn isch das cool, will gly goots witter. Villicht hani mi au gschnitte und nach em 00 wird’s nid grien, sondern es wird e 99 druss heisst das für mi, dass das 05 vo vorig eigendlich e 105 gheisse hett aber die dritti stell halt nid existiert. Sehr sehr uncool.
An fascht jedere Strosseample stönd e grüppli Schlümpf, in Schriftsprache auch Polizei genannt.

Schuelbus moll anders...

Polizist wird me in Kambodscha übere Kolleg oder de Unkle. Ussbildig bruuchts keini. Uniform aa, Helm uff, Lüchtstab ind Hand und ganz bös driiluege, Priefig bestande, bisch Polizist. Poliziste sind in dr Regel dämentsprächen unbezalt. Uncool. So miend si sich halt ihre Verdienst sälber organisiere. Uncool. Dämentsprächend fische si fählbari Motofahrer uss em Verkehr use. Ich würd jetzt däm nid cool sage, aber isch jo eigendlich OK. Aber was denn chunnt isch eher uncool. De Polizist fot afo erkläre was me falsch gmacht hett und will d’Papier gse. Wär schlau gnueg isch hett sich e Kopie vo sine Usswiis lo mache lo, will schunsch isch d’Gfohr, dass er si nümm gset gross. Losst sich nämmlig alles in Gäld umwandle. Uncool. De Töfflischlüssel so schnäll wie möglich useneh und in Hosesack stecke. Schunsch isch dä au wäg. No meh uncool. De Polizischt verzapft eim denn uff e sehr uncooli Art, was me ebe falsch gmacht hett und denn verzellt er eim d’Buess. Das isch so bitz nach em zuefallssystem. Bi emne Barang (Ussländer) isch d’Buess grundsätzlich grad 10 moll höcher wie bi emne Iiheimische. Drumm muess me märte. Au uncool und sehr miehsam. Schlussändlich sött me emne Polizist nid meh als 1 Dollar gä. Das isch jo no cool, wills fascht nütt isch. S’Problem isch jo nid de Betrag, sondern dass me natürlich kei Quittig kriegt, und jede weiss, dass das Gäld diräkt in sini täsche goot und die vom Vorgsetzte. Anyway, das isch au no verkraftbar. Witters sehr uncool isch, wenn me sich nid d’Zyt zum märte nimmt und eifach das gitt wo si wänd, denn merke si sich wär du bisch, kommuniziere das untenander und d’Chance dass me usegfischt wird stiigt beträchtlich. Sehr uncool. Vor allem als Barang uff emne traditionelle Töffli mit farbigem Helm wome uffahlt wiene Pinks Huen… sehr uncool.
Denn Si fische eim au uuse ohni dass me öppis falsch gmacht hett. Das isch denn no vill meh uncool. Do letschti bini an ere krützig gstande, ha öpper ufe flughafe welle fahre, fahr bi grien über d’krützig, promt stönd si dört und blockiere mer de wäg. Ha kei zyt gha zum diskutiere, will mi Passagier uffe Flughafe hett miesse. Drumm hanene das gä wo si händ welle und bi witter gange. Sehr sehr uncool gsi.
Das isch de wäg wies do lauft. Vo de Locals isch das zimmli akzeptiert. D Buesse sind e bestandteil vom monatliche Budget, wenn überhaupt eins existiert.

Jo trotzdäm, Ych ha do mi Honda Daelim 100 City, es grät wo in dr Schwiz leider nid existiert. Täglich fahri mindestens e Stund will d’Distanze vo unsere Büros woni schaff scho beträchtlich sind. Grundsätzlich cool.
Soso scho widr e Roman. Duet mer leid. Ych mach mi jetzt ufe wäg uff mim Töffli durch die relativ cool/uncool Verkehrsanarchie vo Phnom Penh.

Let’s talk about Traffic

Montag, Mai 3rd, 2010

Wenn me mi würd froge was in Kambodscha am unterschiidlichste isch wie in dr Schwiz, den würdi de Verkehr näbe em Food, de Schrift, Sproch und Ussetemperature sicher au in de Top 5 Sto.

De Verkehr in Phnom Penh isch sones Phänomen. Me muess sich das e bitzli wie Wasser vorstelle wo me in e Kanalsystem ineloss. Es suecht sich eifach de Wäg vom gringschte Widerstand. Und falls sich d’Wasserström neume krützt, denn findet me schone lösig, au wenns e bitz langsamer goot.

Bevor mer mit de praktische Erfahrige afönd bruuchts zerscht bitzli Theorie. Ich weiss, uncool. Aber abwarte: De grösser isch dr stärker, das isch do Gsetz. Mit e Paar ussnahme. D’Reihefolg was d’Obermacht uff de Strosse abelangt gset folgendermasse uss (bim schwächste aagfange)

-          Fuessgänger
-          Velofahrer
-          Chleins Töffli (zahlemässig d’Übermacht)
-          Grosse Töff
-          Grosse Töff mit Regierigsschild
-          Normals Auto (Vorzugswyys Toyota Camri, öppis anders gitts chuum)
-          Chue (Me überfahrt au do keini Chüe)
-          Normals Auto mit Regierigsschild
-          4×4 Offroader
-          Strossepanzer, sprich Lexus, d’Zahl vo Lexus stiigt und stiigt
-          Hummer
-          Lastwage
-          4×4 Offroader, Strossepanzer und Hummer mit Regierigsschild… don’t touch!

Zum Töfflifahre, sprich alles wo Scooter oder eifach nid grösser wie e 125erli isch bruuchts eigendlich sitt neustem e Usswiis. Irgendwie no cool. Obwohl chuum öpper e Usswiis hett. Das isch mit unter anderem au de grund, wisos kei Sälteheit isch, dass me au 8 Jöhrigi buebe gset wo mit 2 Meitli uff em Töff hindedruff d’Hauptstross abe fahrt. Uncool.
D’Mitfahreraazahl uff jedem gfährt isch nid beschränkt. Sehr cool. Es isch so öppis vo praktisch, wenn me zwei lütt uff sim Töffli cha mitneh, oder wenn de Papi grad die ganz 5 Köpfigi Familie uff si chleine Honda schnallt. Uff em Lastwage sitzt grad die ganzi arbeitergmeinschaft uff dr Ladig oder uff dr Fahrerkabine druff, und wär e Pickup mit Ladeflächi hett schuuflet eifach so vill lütt wiener grad luscht hett hinde druff.e

Do hätte jetzt also no guet 5 Passagier meh platz.

Sitt neustem bestoot Helmpflicht. Füre Fahrer. Was d’Passagiere mache isch nid so usschlaggäbend. Mir ziends vor e Helm aazzieh. Will wenns eim moll ufe Ranze schlittlet und me sich de Kopf ohni Helm uffschlot… sehr uncool. Vor allem bi de Spitäler wo me do hett.
ES GITT KEI MFK! Sehr sehr cool! Was fahrt fahrt. Wenns nümm fahrt… Päch gsi. Do gitts Gfährt, do ischs e Wunder, dass do überhaupt no irgendöppis lauft. Do letschti isch mim Motodop (Töfflitaxi) Fahrer 3 moll d’Ketti usekeit uff unserer Fahrt. In dr schwiz wär är scho lang zu Läbeslänglich in einzelhaft verurteilt worde für das Töff wonerm hett.
D’Schattesitte vom ganze isch halt, dass d’Luft um die grosse Strosse ume scho nid so super isch, oder dass es schnäll moll passiert, dass me in ere schwarze Abgaswolke landet. Um ehrlich z’sy schloni mi grad mit emne Hueste ume, wo vermuetlich vom Verkehr chunnt. Uncool…

Mis Toeff, nid grad schön, aber typisch. Und Ersatzteil defür gitts an jedem Strosseegge.

Wenn me d’Strossekarte vo Phnom Penh aaluegt gset me, dass sich mehreri Hauptstrosse durch d’Stadt ziend. Das sind so d’Hauptschlagadere. Wenns wenig verkehr hett sind si super Gmietlich, vill platz, schnäll fahre. Cool. Aber Durch d’Rushour am Morge, übere mittag und am Fyyrobe gsets uss wie ume stück Glace wo an Bode gheit isch und vo Ameise uffgspürt worde isch. E sone Hauptstross hett öppe 2 bis 3 spuure. Obwohl, me chönnts eifach „breit“ nenne. Will Spure sind do nid wirklich anerkannt. De Lexus fahrt mit vorliebene in dr Mitti über de Trennstrich, damit ihm d’Stross ellei ghört, d’Töffli schlängle sich überall duure wos nur möglich isch, s’Trottoir zellt als zuesätzlichi spuur für Töffli und Tuktuks. Tankstellene sind super Optione zum es Rotliecht z’umgo wo eim schunsch am rächts abbiege würd hindere.

To be continued…

Live Style Update

Mittwoch, Februar 17th, 2010

Bi scho die ganz zyt am überlege, was ich euch schribe söll. Will nach wie vor passiert e Huffe do. Ich däng drumm, dass ich euch die wichtigschte Sache e bitz zämmefasse due.
Ich bi ussem Guesthouse gworfe worde :D Nanai, bi brav gsi. Aber si händ dummerwiis die 4 Rüüm wo mer im WEC Office händ dopplet Buecht. Jetzt wohn ich bi dr Maggie. Si isch d’Leiterin vo dr WEC Cambodia und isch grad uff Heimatsurlaub in Malaysia. Si hett e super tolli Wohnig. Gross, irgendwie rustikal, andersitts voll typisch. Isch schwiirig zum erkläre was das heisst. Aber ich wird no fötteli uffelade. Was isch denn typisch Khmer? S’Standard Khmer Huus bestoot uss 2 Stockwärk, isch öppe 5 uff 10 Meter gross. D’Vorderfront isch de Iigang und wenn me iinechunnt stoot me in dr Stuube / Garage oder für was es au immer bruucht wird. Dä ruum isch beidi Stockwärk hoch. Öppe in dr mitti wird de Ruum trennt in 2 Zimmer überenander. Hinde isch meistens d’Kuchi. Oft baue si das au grad 2 moll überenander. Ehrlichgseit hoffi, dassi so öppis ähnlichs für mi find. Isch none cooli Art zwohne.
Ich darf mit stolz verkünde, dass ich jetzt e Teil vo dr Kambodschanische Verkehrs Anarchie bi. Hamer e Honda Citi 100 Daelim kauft. Juhuu :D Mi erschts eiges motorisierts gfährt. Chunnt mer vill günstiger, wie wenni ständig s’Moto Taxi muess neh.

;"

Mittlerwiile hani au scho fascht alli Schwizer kenneglehrt wo do in Phnom Penh läbe. Es gitt e Huuskreis wo sich öppe 10 Schwizer träffe, wo alli in verschiidene Missionsgsellschafte tätig sind. Isch mega schön wenn me sich mängisch eifach uff Schwizerdütsch cha ussdrugge. Ei Schwizer Familie hett do letschti zu emne Barbeque iiglade. Hmmm isch das fein gsi. Vor allem de Zopf wo si gmacht hett. Himmel =) Und am Mäntig isch de Schwizer Botschafter vo Bankok uff Phnom Penh cho und hett ins Restaurant Tell (das gitts wirklich do!!!) glade zu emne Apéro. Do hani no paar Schwizer kenneglehrt wo au e andere Background wie volounteer Working händ. Die Gschichte wo dr Botschafter zverzelle gha hett sind riisig spannend gsi. Usserdäm gitts importierts Fondue in däm Restaurant. Das wirdi gly moll go probiere. Villicht tönt das alles jetzt e bitz bünzlig, wenn me sich do unter de Schwizer so trifft. Aber wenn me eifach zwüscheduure in dr eigene Sproch cha rede und über Sache cha diskutiere wo dehei abgönd (zum bispil dass mer scho 4 Medallie gwunne händ =) =)… das duet eifach guet.
Hütte händ mini Khmer Lessons aagfange. Es isch scho strub e sproch zlehre wo genau nütt mit dr Muetersproch zdue hett. Aber freu mi druff, dassi mi verständige cha.
Hebed Sorg zu euch, blessings und Lieh-häi (Byebye)

So viele Wow’s

Dienstag, Januar 26th, 2010

Es isch grad Morge frieh. Irgendwie e ganz e spezielle Momänt wenn d’Stadt so langsam uffwacht. Vo irgendneume här ghöri Khmer Musik. Ich schätz es hett öppe 27 Grad. Chüeler wirds zimmli sicher nid hütte.
Sitt ich do bi, bini am Iidrück uffsuuge und sammle, ich bi fasziniert vo allem woni gse, woni schmeck oder woni ghör. Alles isch anders.
Gescht bini moll uffe Velo gstiige und bi chli durch d’Verkersanarchie vo Phnom Penh gfahre. Ha sogar widr zrugg gfunde =) Am beschte gfalle mer d’Restaurants. Me sitzt uff emne Art Küssi an emne Tisch wo nid höcher isch wie 30 cm. Je mehr lütt, desto mehr vo dene Tisch reiht me anenander. S’Khmer ässe isch sehr speziell, aber guet. Vill sache woni no nie probiert ha. Vill Sache woni au nonig so schnäll probiere wird :D
Gescht hani mi Projäktleiter und no anderi Lang- und Kurzzyt Mitarbeiter kenneglehrt. Derunter au 5 Schwizer. S’duet guet zwüsche duure e bitz Schwizerdütsch zrede. I bi absolut faszieniert vo dene Mensche.

So, jetzt gangi mer e Kaffi go mache mit minere eigene 75 Rappe Kaffi “Maschine”, Ha sogar usegfunde wie si funktioniert =)

In dr Galerie finde dr e paar vo mine erschte Iidrück