Töff

...now browsing by tag

 
 

Country Roads

Freitag, Juni 11th, 2010

D’Mary, e gueti fründin vo mir, uss de Staate, wo au es Joor in Phnom Penh isch, hett Problem mit ihrem Visum becho und hett kurzfrischtig über d’Gränze miesse. Drumm hett si mi gfroggt, öb ych mit ihre uff Koh Kong chumm. Koh Kong isch im Südweste vom Land an dr Küste und an dr Gränze zu Thailand. Do ich e Szenewäggsel sowiso e bitzli nötig gha ha, hani zuegseit und ha als Scherz nochegfroggt, öb mer nid ächt mit em Töffli wänd go. Si hett das e super Idee gfunde, was ich zwar nid erwartet ha, aber so händ mer also afo plane.

Schlussändlich händ mer uns am Samstig am morge am 6i troffe, dass mer vor dr Brüetende Sunne e grosse Teil scho chönned fahre. De Lonely Planet seit es sige 271 km, s’Strosseschild seit 380 km. Isch e interessanti Differänz.

Am halb 9i am Morge

Mit gnueg Wasser, ere Fläsche Ersatzbenzin (mi Tank fasst nur 3 Liter) und emne volltankte Töffli händ mer uns ufe Wäg gmacht. Uss Phmom Penh uuse isch de Verkehr rächt dicht gsi, sind drumm nid so schnäll vorwärts cho. Mit de Zyt hett sich de Traffic afo liechte. Mir sind uff einere vo de Nationalstrosse gsi. Autobahne gitts keini. S’töffli spuelt brav um die 80 bis 90 Km/h.
Öppe zwei Stund spöter chömme mer am 100 km Milestone verbyy.

Gly druffabe händ mer uns e Pause gönnt. Kuy Tyu chia Mui satsch tschrug. Nuudlesuppe mit Schweinefleisch. E super zmorge. Bald sind mers widr uffem Töffli gsässe und langsam hett die flachi Landschaft uffghört und mir sind in e einsamere, aber sehr Idyllische Egge vo däm Land cho. Immer weniger dörfli, immer weniger Ständ wo eim Benzin in 1 Liter Pepsi Fläsche verkaufe. Tankstelle gitts scho sitt e paar km keini meh. Das Fläschebenzin isch sone näbeverdienst vo villne Khmer, vor allem uff em Land, aber au in dr Stadt. uss irgendwelchne Gründe isch das Benzin fascht immer in Pepsi Glasfläsche abgfüllt. Das Benzin isch importiert uss Vietnam und himmeltruurigi Qualität ;) Jänu. Besser als kai Benzin.

D'Ussicht no vor de Bärge

Zwüsche de Bärge und unzählige Schlaglöcher händ mer drei Flüss miesse überquere. Die Brugge gsend uss wie riisigi Schanzene:
Das isch e Bild vo sonere Brugg, aber wills nid mi fötteli isch, duenis eifach verlinke

Bis vor 3 Joor hetts do no keini Brugge gä. Me hett jewyyls uffd Fähri, wo nütt anders wiene grössers Floss gsi isch, miesse warte und denn sind d’Fahrzüg ans andere Ufer verschifft worde. Lutt züügebricht isch d’Fähri uss Prinzip immer uff dr andere Flussitte gsi, wenn me acho isch und dämentsprächend hett me miesse warte. Aber ich dängg wärs pressant hett, hett sich wirklich für die falsch Streggi entschiide.

Irgendwenn hetts denn ganz uffghört mit Hüser. Nur no Stross, Jungel, 2. Gang und 40 kmh uffe, 4. Gang und 100 kmh abe, schlagloch, Elefantewarnschild, wunderschöni ussicht. Isch fantastisch gsi. nach öppe 2 stund isch mi 3 Liter Benzintank leer gsi. Glücklicherwyys hani mini Fläsche debii gha. Und mit däm Benzin händ mer denn e halb stund spöter die Bärge hinter uns glo und e Restaurant erreicht.

Die Khmer wo dört gsi sind händ mi ussglache woni kalts Wasser über de Motor vo mim Töff glehrt ha. Aber woni ihne erklärt ha was de Hero grad gleistet isch händ si das scho verstande. Und ych bi stolz gsi, dassi das uff Khmer ha chönne erkläre. Denn hani mi natürlich no de Standartfroge miesse stelle: Wie lang händ dr gha? Wenn sind dr gstartet? Wie tüür ischs töff gsi? Und wievill Benzin hesch brucht? Nach dere Konversation sind si denn in ihrem Lexus devo gfahre. Mir händ no chli Vietnamesischs Benzin iineglo und denn händ mer de Ändspurt uff Koh Kong anegleggt.

Dörte aacho isch fascht alles ussbuecht gsi, aber mir händ e wunderschöns Bungalow Ressort gfunde wo no für uns Platz gha hett. E Rundi im Pool schwimme isch s’beschte nach so ere Fahrt.

Mit e chli ungnäme Näbeeffäkt hett denn d’Mary au ihres Visum becho. Ich ha nid über d’Gränze dörfe, will das mis Visum nonig zuelosst. Schad, hätt dä stämpel no gärn im Pass gha :D

In Thailand isch Glücksspiil und somit Casinos nid erlaubt. In Kambodscha jedoch scho. Also Iigschränkt. Casinos sind erlaubt für Touriste. E Khmer isch nid befuegt z’spiile. Usser är hett natürlich die entsprächende Finanzielle mittel. uff alli Fäll hett sich das kambodscha z’nutze gmacht und hett reihewyys Casinos uff Kambodschanische Bode gstellt wo aber e diräkte Iigang mit ere separate Zuefahrtsstross uff Thailand händ. Sprich d’Thailänder chönne mit de Autos diräkt in die Casinos fahre ohni Zollaglägeheite. So ähnlich wie de Flughafe Mulhouse.

Die ganz nacht hetts grägnet und am neggschte Morge au. Nid die bescht vorussetzig zum mit emne 100er Honda Daelim widr über die Bärge zrugg zfahre. Drumm händ mer de Töff in e Bus verlade und sind mit em Bus ind Stadt zrugg gfahre.

Isch e riise Hammer Erläbnis gsi. Und ich hane total neui Sitte vom Land dörfe kennelehre. Ich hoff sone Chance bietet sich gly widr.

Ah jo und übrigens… Es sind 280 km gsi. Sprich dä typ wo s’offizielle Schild gschriibe hett hett sich bitz verschätzt.

Let’s talk about Traffic

Montag, Mai 3rd, 2010

Wenn me mi würd froge was in Kambodscha am unterschiidlichste isch wie in dr Schwiz, den würdi de Verkehr näbe em Food, de Schrift, Sproch und Ussetemperature sicher au in de Top 5 Sto.

De Verkehr in Phnom Penh isch sones Phänomen. Me muess sich das e bitzli wie Wasser vorstelle wo me in e Kanalsystem ineloss. Es suecht sich eifach de Wäg vom gringschte Widerstand. Und falls sich d’Wasserström neume krützt, denn findet me schone lösig, au wenns e bitz langsamer goot.

Bevor mer mit de praktische Erfahrige afönd bruuchts zerscht bitzli Theorie. Ich weiss, uncool. Aber abwarte: De grösser isch dr stärker, das isch do Gsetz. Mit e Paar ussnahme. D’Reihefolg was d’Obermacht uff de Strosse abelangt gset folgendermasse uss (bim schwächste aagfange)

-          Fuessgänger
-          Velofahrer
-          Chleins Töffli (zahlemässig d’Übermacht)
-          Grosse Töff
-          Grosse Töff mit Regierigsschild
-          Normals Auto (Vorzugswyys Toyota Camri, öppis anders gitts chuum)
-          Chue (Me überfahrt au do keini Chüe)
-          Normals Auto mit Regierigsschild
-          4×4 Offroader
-          Strossepanzer, sprich Lexus, d’Zahl vo Lexus stiigt und stiigt
-          Hummer
-          Lastwage
-          4×4 Offroader, Strossepanzer und Hummer mit Regierigsschild… don’t touch!

Zum Töfflifahre, sprich alles wo Scooter oder eifach nid grösser wie e 125erli isch bruuchts eigendlich sitt neustem e Usswiis. Irgendwie no cool. Obwohl chuum öpper e Usswiis hett. Das isch mit unter anderem au de grund, wisos kei Sälteheit isch, dass me au 8 Jöhrigi buebe gset wo mit 2 Meitli uff em Töff hindedruff d’Hauptstross abe fahrt. Uncool.
D’Mitfahreraazahl uff jedem gfährt isch nid beschränkt. Sehr cool. Es isch so öppis vo praktisch, wenn me zwei lütt uff sim Töffli cha mitneh, oder wenn de Papi grad die ganz 5 Köpfigi Familie uff si chleine Honda schnallt. Uff em Lastwage sitzt grad die ganzi arbeitergmeinschaft uff dr Ladig oder uff dr Fahrerkabine druff, und wär e Pickup mit Ladeflächi hett schuuflet eifach so vill lütt wiener grad luscht hett hinde druff.e

Do hätte jetzt also no guet 5 Passagier meh platz.

Sitt neustem bestoot Helmpflicht. Füre Fahrer. Was d’Passagiere mache isch nid so usschlaggäbend. Mir ziends vor e Helm aazzieh. Will wenns eim moll ufe Ranze schlittlet und me sich de Kopf ohni Helm uffschlot… sehr uncool. Vor allem bi de Spitäler wo me do hett.
ES GITT KEI MFK! Sehr sehr cool! Was fahrt fahrt. Wenns nümm fahrt… Päch gsi. Do gitts Gfährt, do ischs e Wunder, dass do überhaupt no irgendöppis lauft. Do letschti isch mim Motodop (Töfflitaxi) Fahrer 3 moll d’Ketti usekeit uff unserer Fahrt. In dr schwiz wär är scho lang zu Läbeslänglich in einzelhaft verurteilt worde für das Töff wonerm hett.
D’Schattesitte vom ganze isch halt, dass d’Luft um die grosse Strosse ume scho nid so super isch, oder dass es schnäll moll passiert, dass me in ere schwarze Abgaswolke landet. Um ehrlich z’sy schloni mi grad mit emne Hueste ume, wo vermuetlich vom Verkehr chunnt. Uncool…

Mis Toeff, nid grad schön, aber typisch. Und Ersatzteil defür gitts an jedem Strosseegge.

Wenn me d’Strossekarte vo Phnom Penh aaluegt gset me, dass sich mehreri Hauptstrosse durch d’Stadt ziend. Das sind so d’Hauptschlagadere. Wenns wenig verkehr hett sind si super Gmietlich, vill platz, schnäll fahre. Cool. Aber Durch d’Rushour am Morge, übere mittag und am Fyyrobe gsets uss wie ume stück Glace wo an Bode gheit isch und vo Ameise uffgspürt worde isch. E sone Hauptstross hett öppe 2 bis 3 spuure. Obwohl, me chönnts eifach „breit“ nenne. Will Spure sind do nid wirklich anerkannt. De Lexus fahrt mit vorliebene in dr Mitti über de Trennstrich, damit ihm d’Stross ellei ghört, d’Töffli schlängle sich überall duure wos nur möglich isch, s’Trottoir zellt als zuesätzlichi spuur für Töffli und Tuktuks. Tankstellene sind super Optione zum es Rotliecht z’umgo wo eim schunsch am rächts abbiege würd hindere.

To be continued…

Live Style Update

Mittwoch, Februar 17th, 2010

Bi scho die ganz zyt am überlege, was ich euch schribe söll. Will nach wie vor passiert e Huffe do. Ich däng drumm, dass ich euch die wichtigschte Sache e bitz zämmefasse due.
Ich bi ussem Guesthouse gworfe worde :D Nanai, bi brav gsi. Aber si händ dummerwiis die 4 Rüüm wo mer im WEC Office händ dopplet Buecht. Jetzt wohn ich bi dr Maggie. Si isch d’Leiterin vo dr WEC Cambodia und isch grad uff Heimatsurlaub in Malaysia. Si hett e super tolli Wohnig. Gross, irgendwie rustikal, andersitts voll typisch. Isch schwiirig zum erkläre was das heisst. Aber ich wird no fötteli uffelade. Was isch denn typisch Khmer? S’Standard Khmer Huus bestoot uss 2 Stockwärk, isch öppe 5 uff 10 Meter gross. D’Vorderfront isch de Iigang und wenn me iinechunnt stoot me in dr Stuube / Garage oder für was es au immer bruucht wird. Dä ruum isch beidi Stockwärk hoch. Öppe in dr mitti wird de Ruum trennt in 2 Zimmer überenander. Hinde isch meistens d’Kuchi. Oft baue si das au grad 2 moll überenander. Ehrlichgseit hoffi, dassi so öppis ähnlichs für mi find. Isch none cooli Art zwohne.
Ich darf mit stolz verkünde, dass ich jetzt e Teil vo dr Kambodschanische Verkehrs Anarchie bi. Hamer e Honda Citi 100 Daelim kauft. Juhuu :D Mi erschts eiges motorisierts gfährt. Chunnt mer vill günstiger, wie wenni ständig s’Moto Taxi muess neh.

;"

Mittlerwiile hani au scho fascht alli Schwizer kenneglehrt wo do in Phnom Penh läbe. Es gitt e Huuskreis wo sich öppe 10 Schwizer träffe, wo alli in verschiidene Missionsgsellschafte tätig sind. Isch mega schön wenn me sich mängisch eifach uff Schwizerdütsch cha ussdrugge. Ei Schwizer Familie hett do letschti zu emne Barbeque iiglade. Hmmm isch das fein gsi. Vor allem de Zopf wo si gmacht hett. Himmel =) Und am Mäntig isch de Schwizer Botschafter vo Bankok uff Phnom Penh cho und hett ins Restaurant Tell (das gitts wirklich do!!!) glade zu emne Apéro. Do hani no paar Schwizer kenneglehrt wo au e andere Background wie volounteer Working händ. Die Gschichte wo dr Botschafter zverzelle gha hett sind riisig spannend gsi. Usserdäm gitts importierts Fondue in däm Restaurant. Das wirdi gly moll go probiere. Villicht tönt das alles jetzt e bitz bünzlig, wenn me sich do unter de Schwizer so trifft. Aber wenn me eifach zwüscheduure in dr eigene Sproch cha rede und über Sache cha diskutiere wo dehei abgönd (zum bispil dass mer scho 4 Medallie gwunne händ =) =)… das duet eifach guet.
Hütte händ mini Khmer Lessons aagfange. Es isch scho strub e sproch zlehre wo genau nütt mit dr Muetersproch zdue hett. Aber freu mi druff, dassi mi verständige cha.
Hebed Sorg zu euch, blessings und Lieh-häi (Byebye)