Siem Riep

...now browsing by tag

 
 

Bridge of Hope in Siem Riep

Mittwoch, August 18th, 2010

Die Wuche bini für 4 Tag uff Siem Riep uffe. Siem Riep isch die Stadt wo d’Touriste ane gönd wenn si s’berüemte Ankor Watt wänd go bsueche. Für mi isch es scho s’zweite moll do. Bi scho mit em Cousinli und ihrem Fründ dört gsi im April. Dissmoll isch es aber öpppe 15 Grad chüeler. Wunderbar. Heiss isch es aber immerno ;)

Kurz bevor ych in Kambodscha aacho bi sind d’Valeria uss Brasilie, wo sitt öppe 14 Joor im Land isch und d’Christine uss em Ellsass, wo au scho sitt mehrere Joor do isch, vo Phnom Penh uff Siem Riep Züglet zum do es neus Projäkt uffzzieh. Neu isch übertriibe. Eigendlich händ si scho s’glyyche in Phnom Penh gmacht. Denno isch dä Schritt, dass sich die 2 uss em vertraute Umfäld vo Phnom Penh glöst händ und 6 Bus Stunde nördlicher uffe gange sind e muetige und schwiirige Schritt.

Es handlet sich ume Schuel wo Kinder vo de Slums und de Abfallsammelstelle ane chönne. Do In Siem Riep isch d’Situation no prekärer als in Phnom Penh. Will do hetts no chuum NGOs wo sich um die Lütt kümmere. Die letschte 6 Mönet händ die zwei nocheforschige aagstellt, wo denn de gröschti Need isch. Bi ihrer Arbet im Slum händ si usegfunde, dass es Kinder im Kindergarte alter sind, wos an jeglicher Ussbildig fählt. Drumm händ si sich füre Schuel wo die Grundlageussbildig aabietet entschiide.

Die zuekünftigi Schuel

Durch Programm, Spiil, etc händ si die Kinder kenneglehrt und händ sich so quasi bekannt gmacht im Slum. Villi vo dene Kinder chönne nid ind schuel, will si Kinder vo illegale Vietnamese sind und vo däm här kei aarächt uff d’Schuel händ. Und wenn si das Aarächt hätte, denn chönnte si sichs meischtens gar nid leischte an e staatlichi Schuel zgo. Die Staatlichi Schuel isch faktisch gratis, aber will d’Lehrer derart übel verdiene verlange si vo de Schüeler e art „Ussbildigsgäld“ vo öppe 30 Rappe am Tag. Das isch im ganze Land so. Und das verunmöglicht ville Kinder e schuelischi Ussbildig. Denn gitts natürlich no die Fäll wo d’Eltere d’Kinder zum schaffe bruuche und se drumm gar nid ind schuel lönd. Do versuecht me de Eltere öppis aazbiete wo glyychwärtig isch wie de Betrag wo s’Kind mit sinere Arbet iibringe chönnt. Aber vorzugswyys nid in form vo Gäld, sondern eher Ryys oder so.

D’Situation vo dene Kinder wo Abfall ussortiere uff de Abfallbärge isch bsunders brekär. Wenn ych als Huushalt mi Abfall uffd Stross stell, denn chömme zerscht moll d’Recicler und Sueche uuse was si chönne bruuche. Fläsche, Karton, Dose, Plastik, etc. Das sind scho relativ armi Lütt wo das mache. Die Lütt wo uff de Abfallwäge schaffe nämme denn jede einzelni Sack au nomoll usenander und nämme use was verwärtet wärde cha. Das isch e guete näbeverdienst näbe ihrem sehr tragische Lohn. De Rästabfall wird im Abfalldepot nomoll vo dr Abfallfirma sortiert. De Rästmüll landet denn uff em Abfallbärg. Dört sind die Kinder und versueche no öppis uss em scho 3 moll vorsortierte Abfall usezfinde wo si evt no bruuche chönne.

Jetzt sind die 2 Ladies do in dr Schlussvorbereitigsphase. SI händ e riisigs Huus für 500$ im Monet gfunde. Was sogar für do rächt günstig isch. Die Villa wird jetzt zuenere Schuel. Ich bi do uff echo, zum hälfe ihri paar Computer z’zügle und sicher z’stelle, dass s’Internet suuber züglet wird. Do debii hani au no chönne aapacke e paar Gstell etc z’Verschiebe. In 2 Wuche söll die Schuel uffgmacht wärde. Bi gspannt wie das uusechunnt und freu mi denn wenni mit mim Bsuech im Novämber darf go luege, wies dörte so lauft.

Hütte darfi de Oobe mit em David und Aneva und ihrem chleine Sohn Tim verbringe. Si sind Missionare do in Siem Riep und schaffe au füre Schuel. Es isch schön wenn me zwüscheduure cha e chli Schwizerdütsch rede =)

E mega tolle Bsuech und villi Erkenntnis.

Freitag, April 9th, 2010

Wirklich super, Donstig isch mini cousine Silja und ihre Fründ de Mischa in Phnom Penh aacho. Si mache e chlini Asiereis und händ welle cho luege was ich do so triib. Fantastisch. Mir händ 3 tolli Däg in Phnom Penh verbrocht, händ vill gse, probiert und gredet. Druff abe sind mer mit em Bus uff Siem Riep gfahre zum Ankor Wat go bsueche. Das goot öppe 6 Stund mit em Bus. Aber bevor mer uff Ankor sind, sind mer es Kinderheim go bsueche. D’Silja und de Mischa händ 7 Notebooks uss dr Schwiz mitbrocht zum das Kinderheim z’unterstütze. Es isch wahnsinnig iidrücklich gsi mit wellere Freud mir vo dere Kinderschar empfange worde sind und mit wellem Interässe die Notebooks inspiziert worde sind. E riise Tat vo dene zweine, e ganz e tolli Erfahrig isch das gsi.

Unsere Empfang im Kinderheim

Ich bi glücklich, dass ich das ha dörfe miterläbe. Und denno hett sganze au villi Gedanke mit sich brocht. Die Kinder in däm Kinderheim händ ihri Eltere vorwiegend durch HIV oder Mine-Detonatione verlore. Die Kinder sind glücklich und uffgstellt gsi, aber denno sind si alli Traumatisier. I ha denn afo überlege was si ächt alli füre Gschicht händ. D’Vergangeheit vo dene Kinder wird sehr schwiirig sy. Aber widerrum isch es denn eifach schön gsi zgse, dass si en emne Platz aacho sind, wo sich lütt um si kümmere. Wo si änglisch, japanisch und Computer lehre. Denn das isch genau das wo si für ihri Zuekunft bruuche.
Am Tag druff sind mir uff Ankor gange. Ankor Wat isch s’Wahrzeiche vo Kambodscha, es Wältkulturerbe, e richtigi Tämpelstadt. Was mir dört erläbt händ isch schwiirig zum beschriibe, drumm verlink ich euch am beschte zu de Bilder, damit dr e Iidruck krieged.
Siem Riep isch die Stadt wo diräkt an Ankor aaschliesst. Dört sind alli Hotel, Märt, Tuktuks etc. Siem riep isch sehr Touristisch. Aber genau an dene Touristische Orte isch klar worde, wie arm dra d’Lütt in däm Land zum Teil sind. Es hett villi Bättler gha. Nid nur in Siem Riep. Au in Phnom Penh in de Touristische viertel oder an de Busstatione uff em Land usse chömme sy. Si sind entstellt, es fähle Körperteil, si schleppe chliini Kinder aa, etc. Es stellt sich denn immer d’Frog… Was vo däm ganze isch gstellt und was nid. Fakt isch dass me de Kinder nütt sött gä. Au nid öppis abkaufe. Will d’Kinder miend das Gäld diräkt de Eltere abdrugge. Und Grundsätzlich sött s’Kind ind schuel. Aber solang s’Kind Gäld heibringt gsend d’Eltere kei Grund zum ihri Kinder ind Schuel schigge.

Sunneuffgang hinterem Ankor Wat

Das isch unter anderem e Projäkt wo eine vo unsere Mitarbeiter dra isch. Är goot zu de Abfall deponie und redet mit de Familiene vo de Abfallsammelkinder. De Eltere gitt är das Gäld wo s’Kind öppe vom Abfall heibringe würd (Das sind mikrigi beträg) und defür schigge d’Eltere die Kinder ind schuel. Find ich persönlich e riise Sach.
Wenni so mit em Bus denn vo Siem Riep uff Phnom Penh fahr wird mir klar wie strub d’Umständ in däm Land sind. De grösst Teil vo de Bevölkerig läbt nid in Städt, sondern an Dörfli in de Provinz. Die Törfli händ zum Teil nid moll strom. Si läbe in Holzhüttene als ganzi Familie in eim Ruum. Si sind sälbsternährer und das wo si durch de Riis-aabau verdiene bewegt sich im 2 stellige Dollar Betrag… Pro Joor… Solang d’Lütt gsundheitlich guet binenander sind funktioniert das guet. Jedoch sobald nur sgringschte passiert, sprich sich öpper de Arm bricht, e Unfall macht oder s’Töffli kaputt goot, denn wird’s schwiirig. Versicherige gitts chuum oder sind nid bezahlbar für die Lütt und d’Spitäler nämme nur lütt uff wo finanzielli Mittel chönne uffwiise.
Villi Familie schigge ihri Söhn oder Vätere uff Phnom Penh damit si dört als Moto Fahrer chönne Gäld verdiene. Defür schaffe d’Fraue und d’Kinder uff de Fälder. De Verdienst wo d’Männer heibringe isch kläglich. Ihri Motos wo si demit fahre chömme chuum vorwärts, will si d’Reperatur nid chönne zahle. Do letschti hani e Motodriver gha, däm isch 3 moll d’Ketti uusegheit uff unserer Fahrt. I hanen denn zu ere Wärkstatt gschiggt und hanem bitz Gäld gä damit ers cha repariere. Ich hoff jetzt halt är isch schlau gnueg gsi zum das au wirklich mache.
Oje scho widr so vill Text. Sorry. Mir wird eifach alls wie meh bewusst, dass ich do zwar in Asie bi, aber wirklich in emne Land gläge bi, wo sichs in dr Stadt zwar rächt guet läbe lost, aber de Standard uff em unterste Niveau isch. Verglychbar mit gwüsse Afrikanische Länder wo für ihri Armuet bekannt sind. Ich ha das nid so richtig realisiert die erschte paar Wuche. Aber je länger dassi do bi, desto meh wird mer das klar. Ich sälber bi froh, dass ich mi Teil in däm Joor darf biitrage und e chlini Chance immerhin für e paar Lütt darf zur Verfiegig stelle. S’schöne isch, dass denn die Lütt mit ihrem Wüsse widr e Chance für öpper anders dörfe Sy.
Und schlussändlich muess eifach einisch meh gseit wärde, dass das Unterfange ohni euri Unterstützig nid möglich wär. Ich bi mir sicher, dass dir mit eurer Unterstützig am genau richtige Ort investiered.

D’Fötteli vo unsere Erläbnis findsch in dr Galerie