Chouen

...now browsing by tag

 
 

I’m an Alien, i’m a little Alien

Dienstag, April 20th, 2010

Mhm… Nämmlig sobald me e chli usserhalb vo Phnom Penh umelungered isch me DIE sensation. Eigendlich hätti chönne Gäld verlange, dass mi d’Lütt dörfe aaluege. Hehe Blödsinn.
Was bringt mi überhaupt dört uuse? Es isch Khmer neu Joor gsi. De höggschti Fiirtig in Kambodscha im Joor. Mir schriibe jetzt s’Joor 2554 nämmlig. Kai wunder luege si mi wine Alien aa, denn ich fiir schliesslich nöggscht Sunntig mi 570e Geburtstag. Jetzt wird mer alles klar. E Wuche lang stoot ganz Phnom Penh still, wills e riise Völkerwanderig ind Provinz use gitt, will jede sini Familie will go bsueche. Völkerwanderig im wahrsten Sinne des Wortes. D’Strosse sind derart verstopft, dass es nümm vorwärts und ruggwärts goot. Büs, Töffs, Cars, Traktorwäge mit 50 Passagier, Lastwäge mit Passagier uff de Dächer, und vill witters struubs. Ich bi zum Glück scho am sunntig Mittag abgfahre und bi ohni witteri Problem bim Chouen sinere Schwiger Familie aacho.
ich wird vo dr Schwöster vo dr Vannet (D’Frau vom Choeun) abgholt. Si bringt mi in ihres huus. E grosses, schöns Holzhuus. Tschamriep Suo dört, Tschamriep Suo do und immer brav verneige, D’Fingerspitze öppe uff de Höchi vo dr nase, wie sichs ghört.
In dere Wuche hani e Huffe über d’Khmer Kultur glehrt. Vor allem über d’Art und Wyys vom zämme läbe, aber au über d’Gschichte vom Chouen und dr Vannet ihrer Familie. Aber uff das gangi evt e anders moll yy.
Das Holzhuus woni aagsproche ha isch e Pfahlbaute. Khmer baue uff Pfähl wills in de Rägezyt vill überschwemmige gitt. Widerum findet me unter em Huus e chüele Schatteplatz und dört isch denn eigendlich so s’Wohnzimmer. Ins Huus sälber goot me nur zum go schlofe. Obwohls sich uff ere hängematte dusse au sehr guet schlofe losst. Kocht wird au unterem Huus. uff füür. 4 Fraue sind flissig am schnätzle und Koche. Ich ha kei Aanig was mi erwartet.

ich bechumm sogar e gschänkli

In Kadmbodscha hett d’Familietradition, wieni sicher au scho erwähnt ha, e sehr hoche Standard. Die Jüngere gschwüsterti (p’own srey und p’own pro) diend sich de ältere gschwüsterti (bong srey und bong pro) unterordne. D’Kinder diend sich de Eltere sehr stark unterordne. Nid nur de Eltere, sondern au de Unkle und Tantene gegenüber. Authorität wird so wie ichs bis jetzt spür no sälte in Frog gstellt. Die Höggschti Position hett d’Grossmueter. Ich sag jetzt explizit Grossmueter, wills Grossvättere chum meh gitt. Ich muess sage, ich sälber ha no nie e Grossvater kenneglehrt. So vill Männer sind em Genozid vo de Rote Khmer vor 30 Joor zum Opfer gfalle. Das merkt me ganz krass, will eifach d’Generation vo de ältere Männer fascht ganz fählt. Wieni erwähnt ha sind d’Fraue fürs Huus verantwortlich. Rüste, Koche, Serviere, abruume. Aber es chunnt au vor, dass Männer mit aapacke. De Huusherr sälber eher weniger und Ych als Gascht ha eh kei Chance öppis zmache. De Huusherr kümmeret sich eher um das wo ums Huus ume isch. Es muess aber denno erwähnt sy, dass d’Huusherrin e mächtigi Position hett. Si isch so quasi d’Königin im Huus. Si isch die wo ufem Märt goot go iikaufe, oder zumindest entscheidet, was kauft wird. Si hett au d’Finanze in de Händ. D’Grossmueter hett so bitz de pensioniertestatus. Si isch au oft in dr Kuchi aawäsend, hilft au moll öppis mit, aber isch nümm in dr Verantwortig. Si zieht sich au eher moll zrugg. Natürlich isch das d’Familiesituation, wie ich se jetzt erläbt ha. In dere Familie isch e huffe passiert und das hett sicher dezue Biitreit, dass die Strukture so klar sind.
E Khmer isch nid öpper wo gärn stundelang am Tisch sitzt nach em ässe wie mir. Ässe isch meh e Bestandteil vom Tag und nach em ässe wird pfuust oder wittergschafft. Während emne Fiirtig wie Khmer neu Joor isch das bitz anders. Do bliibt me am Tisch sitze, d’Karte wärde füre gholt und e Bierli wird uffgmacht. Sofärn nütt anders statt gfunde hett händ mer denn jewiils de ganz Tag am Tisch verbrocht. So gege 2 am Nomidag isch denn d’Soundaalag aagworfe worde und denn isch Khmer Musik gloffe bis am 10i zoobe. Vermuetlich hetts s’ganze dorf ghört. Aber do sind d’Nochbere e bitzli Kulanter wie in dr Schwiz. Nur es bitzli. Villicht freue si sich sogar derüber, dass e bitz Musik lauft. Für mi persönlich isch es e durchhalteprob gsi hehehe.
Am zweite Tag vo de Fiirtige gönd d’Buddhiste in d’Tämpel go opfer bringe und go Bätte oder sich vo emne Mönch reinige lo. Uff em Wäg zrugg stönd jugendlichi mit Wassersäck oder Ballön und wärfe die de Töff und Velofahrer aa. Das sött zur Reinigung diene. Es isch grundsätzlich bitz anders dänkt gsi, aber die Junge händ das e bitz zu ihrem eigene Amusement gänderet.
Am Oobe stellt jedes Huus e Tisch parat mit früschem ässe, Konsärve und andere Gabene und verziert dä Tisch schön. Dä Tisch wird denn an Huusiigang gstellt. Die Gabene sind für d’Ängel dänggt. Falls die Ängel nid verbii chömme wärde die Sache denn 3 Tag spöter abgruumt und sälber gässe.
Was genau dehinter steggt weissi sälber nid so genau. Ich verzell euch eifach das wo mir verzellt worde isch. Und das isch nur sehr oberflächlich. Do stegge johrhunderti alti Traditione dehinter. Also das mit em Tanze, Wasser und em Opfer.
Ich bi denn die Wuche mit Khmer Kuchi verwöhnt worde. Ha villes Probiert woni no nie gse ha und woni au nümm weiss was es gsi isch. Vill gmies, vill Fleisch, und vor allem Ryys halt. Ich bi uff em Märt debii gsi wo si die Sache kauft händ und bi umso meh verstuunt, dass ich überhaupt keini Mageproblem gha ha. Umso meh dankbar bini do defür.
Am oobe jewiils sind denn die richtige Feschter losgange. Mir sind anderi Familiene go bsueche. Es isch nomoll richtig deftig kocht worde. Lutti Karaoke hett niene gfählt. Wichtig isch de baum wo in dr Mitti vom Hof, Vorgarte, oder was au immer stoot. Um das Bäumli ume wird tanzt. Me beweggt sich im Rhythmus vo dr Musik und d’Händ mache bewegige wo s’seihe und ärnte vom Ryys symbolisiere sölle. Ich als „barang“ (Barang heisst „Franzos“ und isch es Synonym für Ussländer oder Fremde) bi natürlich d’Hauptattraktion gsi und bi vo X Damene zum Tanz uffgforderet. Ich ha zwar kei aanig gha, aber ha mi eifach druff iilo. Has no sehr speziell gfunde.

Erschti versüech im Traditionelle Tanz

Jo ebe de Barang. In Phnom Penh isch e Barang nütt speziells. Die gitts wie Sand am Meer. Aber sobald me ind Provinz uuse goot isch me uff eimoll de einzig. Wieni scho verzellt ha bini jo in emne Dorf glandet wo no nie e Barang gsi isch. In de Städt isch es aber au öppis speziells. D’Lütt freue sich, und si froge sich was e Barang in ihrer Stadt suecht. Für si isch e Barang öpper riichs. Und was suecht öpper Ryychs in ihrem Ort. Uff alli Fäll hani mer denn uff em Märt regelmässig vo de Märtfraue hinter de Fisch und Fleischständ dörfe aalose was ich füre Hübsche bi „sa art!“ vo links und rächts. „hübsch!“ heisst das. Do wird me jo no fascht Hochnäsig hehehe. Wenni denn no uff Khmer ei zwei Wörter mit ene ha chönne rede bini sowiso de Star gsi, oder ebe de Alien wo Khmer cha rede.
Wyssi Hutt isch in Kambodscha s’non plus ultra. Dunkli Hut tisch e Zeiche vo Armuet. Drumm setze vor allem Jungi Fraue und Männer alles dra zum jo nid bruun zwärde. Ab emne Gwüsse alter erübrigt sich das denn. Während däm ich Kurzärmlig uff em Töffli durch d’gegend fahr und freud ha, dass immerhin mini Unterärm e gueti Farb händ gseni lütt an mer verbii Fahre in digge Winterjaggene. Vorzugswiis schwarz. Händsche und Kappene sind au aagseit. D’Vannett isch in ere digge Schwarze jagge bi milde 38 grad näbe mir gstande und hett sich begklagt dass es heiss isch. Ich will mi mit däm nid über si luschtig mache, aber es isch wirklich do öppis ganz wichtigs, de Schönheitsaspäkt vo dr Wisse Hutt. Wer schön sein will muss leiden. Das zellt au do. D’Fraue hälfe denn au gärn no chli noche. Während in dr Schwiz brünlichi Tön ins gsicht gstriche wärde, bruucht me do vorzugswiis Farbtön wo richtig wyss gönd. Nid weniger wie bi uns. Aber wenn eini sich zu wyss aagmolt hett cha das scho bitz beängstigend ussgse.
So jetzt hani scho widr wahnsinnig vill gschriibe, falls die iiträg für euch zlang wärdet, sageds mer bitte. Ych hoff dir sind nid d’Auge zue gfalle. Aber für mi isch es unglaublich spannend gsi, was ich die letschti Wuche do uff em Land usse alles ha dörfe erläbe. Ich hoff dir liidet nid unter em Vulkanstaub und dir verkraftet d’Spargleknappheit.
Shalom und Blessings.

PS: Meh fötteli finde dr in dr Gallerie

Daily Life, oder sgitt halt zdue…

Sonntag, Februar 21st, 2010

Also guet, chömme mer moll zum ärnschte Teil vo min Uffenthalt do in Phnom Penh. Schliesslich sind das do jo nid nur Ferie woni mach. Nai ehrlichgseit bini sehr froh, dass langsam aber sicher e gfestigte Tagesablauf iikehrt. Alls wie meh chunnts.
D’Hauptsach vo minere Arbet isch d’Unterstützig vom Chouen und dr Root IT. Ich verbring öppe e halbe Tag pro Wuche in dr Root IT. Im Momänt bini demit beschäftigt zuezluege, zbeobachte, mängisch gangi mit zu emne Kund zum luege, wie si ihre Job mache, wär ihri Kunde sind, wie si vor gönd, wie si sich verhalte, etc. Debii versuechi usezfinde, was si chönne mache, um effiziänter und marktfähiger zwärde.
De Chouen isch öppe glyych alt wie ych, verhürotet und leitet die Root IT. De Chouen het sini Ussbildig im WEC VTP gmacht. VTP stoot für Vocational Training Program und isch e Schuel gsi wo d’WEC betriibe hett. D’Schüeler sind in IT, Metallbau oder Schniiderei ussbildet worde. Das VTP gitts in dere Form nümm. Me hett sich vor 2 Joor entschiide, dass praktischi Arbet meh Sinn macht. So isch er Informatik Firma (Root IT), e Schmiidi (Ironworks), e Schniiderei (Glory) und mittlerwiile none Restaurant entstande. Alli Die betriib sind gleitet vo ehemalige Schüeler vom VTP.
De hett 3 Techniker und 5 Lehrling. Das isch natürlich e bitz suboptimal, aber immerhin wüsse sich die Lehrling au sälber zbeschäftige und sind sehr Motiviert. E Teil vo minere Uffgob isch es, dene Lehrling öppis z’zeige. Aber das gstaltet sich sehr schwer, will ich mit mine Sprochkenntnis no in de Kinderschueh steck. Aber mit händ und Füess goot das scho irgendwie.
Ironworks und d’Schnyyderei händ au no jewyyls Lehrling. Und die sötte alli Änglisch lehre. Jep und do chumm ych widr ins spiil. Ab nöggschtem Dsischtig bi ich Änglisch Lehrer. Uff Khmer heisst das „Knjom tschiia kru, knjom bang rien phia-sa anglé“ (Ich bi Lehrer, Ich unterricht d’Sproch Änglisch). Bi wahnsinnig stolz, dass ich das scho fascht ohni nocheluege cha. Es isch interessant. Wo ich entschiide ha, dass ich ins Ussland will, hani gseit, ich will unterrichte. Do druss isch aber planmässig nütt worde. Und jetzt bini uff eimoll doch Änglisch Lehrer. Ich freu mi uff das, au wenns e riise Herussforderig wird.
Also zrugg zu mim Daily Life. Uffsto, Zmorge, Änglisch Unterricht vorbereite, halb 9i änglisch für 1 ½ Stund (Dsischtig und Frittig). Denn Töff starte Richtig WEC Office durchs Gwüehl vo dr Phnom Penh Verkehrsanarchie öppe e halb stund. Halb 11i Khmer Lessons, Braincrash, Zmittag, denn widr e Halbstund Verkehrsanarchie bis zum Root IT office (übrigens „Karialai“ uff Khmer, e wunderschöns Wort) und denn bini am Nomidag dört. Zoobe das widerhole woni im Khmer glehrt ha und evt Änglisch vorbereite.
Jo so gsets uss ab nöchster Wuche. E huffe zdue, aber es gfallt mer. Zu mine Khmer Stunde schriibi e anders moll widr, und wie das mit dene änglisch Lessons uusechunnt wirdi euch natürlich au no verzelle.
Schwösterli, alles gueti zum Geburtstag. Bisch die bescht Schwöster woni mer nur cha vorstelle!
Gniessed d’Fasnacht… Ich wird si vermisse.

Please proceed to Gate 75

Samstag, Februar 6th, 2010

Ok ganz ehrlichgseit hett de PNH nid so vill gates. Ich glaub es sind öppe 12 wos hett. Bi nid ganz sicher. öppe 30 Abflüg pro Tag in öppe 13 Richtige. Mir sind also Richtig Kuala Lumpur, Malaysia gfloge. Es isch em Chouen si erscht Flug gsi. Für mi natürlich e grossi Ehr gsi, dass ich do ha dörfe dr Begleiter sy. Wenn ich so zrugg dängg wie lang ich mi uff mi erscht Flug ha gfreut, und wies gsi isch… E riise Sach. Für Ihn isch es erscht si zweiti Usslandreis gsi.
Mir sind also in KUL acho und promt hani mi Natel im Flugi lo ligge. Bis sofort go aamälde. Und promt hani am Tag druff e Telefon becho, dass si mi Mobile gfunde händ! (Papi, bi mir hetts klappt ;). Mega cool.
Am Flughafe sind mir vom CK und sinere Fründin abgholt worde. Är isch defür verantwortlich, dass das überhaupt zstand cho isch. Mir sind denn also am Malaysia F1 Court verbii richtig Kuala Lumpur gfahre. Für mi isch es e Art wie heime cho gsi, will Kuala Lumpur isch rächt witt entwicklet. Einzig dass ich no nie in emne Muslimisch prägte Land gsi bi. Aber de Chouen, für ihn isch es e Iitauche in e Wält gsi, wo är absolut nonig kennt hett. Ich weiss nid genau, wies ihm inecho isch, aber ich has irgendwie no heftig gfunde, will es isch wirklich alles so anders gsi wie in Kambodscha. Ich muess en denn no froge. Aber är isch mega glücklich gsi. Uff alli fäll händ mer denn sehr interessanti gspröch gha mit em CK und em Mr. Simon, vermuetlich unserem zuekünftige Partner. De Mr. Simon sammlet in Europa defäkti Multifunktionsdrucker yy (also die grosse Kopier, Druck, Scan, Faxmaschine), schifft si uff Malaysia und losst si do widr Här richte. Denn verkauft är si witter. Bi absolut begeisteret vo däm wo är macht. Und är würd gärn in Kambodscha Fuess fasse. Und ich ha sgfühl, das isch öppis wo potential hett. Aber zerscht müend d’Vorussetzige mit em Chouen sinere Firma gschaffe wärde. Und do chumm jetzt ich ins Spiil.
Mir isch jetzt wirklich klar worde, wo ich bruucht wird. Wiso ich eigendlich do bi. Und zwar bruucht de Chouen und sini Firma gwüssi Strukture wo für uns Schwizer sälbstverständlich sind, aber do relativ inexistänt. Und do gönd mer jetzt dra. Das ganze muess natürlich sehr vorsichtig passiere. Bi gspannt, wie mer do vorwärts chömme. Aber ich freu mi uff die Herussvorderig.
Mir händ also in Malaysia in verschideni Gschäfter dörfe iineluege. E Spedition sind mer go aluege, wo dr CK si IT business macht, mit em Mr. Simon sind mer in emne Kleikreditunternäme gsi. Isch alles sehr iidrücklich gsi. Gässe händ mer au super. Chinesisch so wienis bis jetzt no nie gha ha. Sight Seeing hetts au e bitz gä. Halt vor allem uss em Auto use. Aber immerhin hani d’Petronas Towers gse. Und dir wüssed jo wie ich freud an Hochhüser ha.
Am letschte oobe sind mer denn no go PC shoppe. Mir händ 2 Laptop bstellige gha zum mitbringe. PC Stuff isch in Kambodscha sehr tür und schwer erschwinglich. Denn sind mer also ine Shoppingzenter wo nur IT Sache verkauft wärde. 6 Stockwärk und öppe 50 Shops pro Stockwärk. E riise Spiilzüglade für e chli grösseri buebe ;). Sblöde isch, dass me für jede Notebook öppe 10 Aagebott findet. Bi dene Agebott gots aber nid nur um Priise, sondern au um das wome alles dezue gratis kriegt. Zu däm Notebook woni denn also kauft ha für öppe 750$ hetts no zuesätzliche Arbetsspeicher 2GB, e USB Hub, E Schutz fürd Tastatur, e Laptoptäsche, e Putzset, E Chüeler etc gä. Do mir 2 Notebooks kauft händ, händ mer am schluss e ganze Plastiksack voll Zuesatzgschänkli gha. Sött me in dr Schwiz au iifüere.
Vor em zruggfliege isch alles chli hastig worde. Unser Pimpts Taxi hett also no dringend miesse go tanke, und irgendwie isch das lang gange und denn isch die Stund fahrt no bitz länger gange. Ich ha doch no müesse mi Natel wo gfunde worde isch go hole. De armi Choeun. Wos denn langsam äng worde isch und ich mi Natel immernonig gfunde ha bini glaub e bitz schwiirig worde. Aber är isch ruhig blibe. Schlussändlich sind mer denn inklusive Natel brav iicheckt und bim Boarding gsi. 1 Stund zfrieh. Psssssssssst, nid witter verzelle.
Dehei aacho (shit isch das komisch, wenn ich vo “dehei acho” red und demit Phnom Penh mein…) hett mi de Martin abgholt. Shett vill zverzelle und zberede gä. Denn sind mer grad no zämme go znacht ässe. Ha mit em Martin do e verantwortliche wo wirklich toll isch. Und unseri Zämmearbet cha glaub wirklich funktioniere.