Aufgabe

...now browsing by tag

 
 

Weekend

Samstag, Januar 30th, 2010

So villi vo euch sind vermuetlich erscht grad vom Ussgang hei cho, anderi vermuetlich scho lang im Bett, Ich ha grad zmorge (Banane, e Frucht woni de Name nid weiss, Rhambutan und Kaffi) gha und gniess die süesse Kläng vo ere Asiatische Stadt (Ha links, rächts, vorne und hinde vom Huus e Baustell. Zwüscheduure fahrt e Tuktuk mit Megaphon verby wo sini Ware aapriist :D :D)

Gescht hani alli Mitarbeiter vo dr WEC dörfe kennelehre. Also vo de Langzit Missionare wo do sind hani jo scho die Meischte dörfe kennelehre. Mir sind e bunt durchmischts Team mit Südafrikaner, Brasilianer, Schwizer, Franzose, Australier, Koreaner und Neuseeländer. Das isch mega spannend. Und gescht sind alli zämmecho, inklusiv allne Iiheimische Jugendliche wo an de verschiidene Projäkt teilnämed und mitschaffed.

Ei Teil vo dr Arbet wo d’WEC do macht sind genau die Workshops. Es gitt 4 vo dene. E Schnyderei, e Metallwärkstadt, e PC Support Zenter und jetzt ganz neu e chlins Restaurant. D’Idee dehinter isch, dass me mit dene Jugendliche do zämme öppis uffbaut und zum laufe bringt und am laufe bhaltet. De wichtigschti Punkt isch, dass bi dene Workshops Jugendlichi d’Chance händ, e aaständige Bruef zlehre. Will e Lehr, so wie mir si kenne gitts do nid. Do gitts eigendlich nur Schuele und Universitäte, wo nid wirklich de Hit sind.
Mini Uffgob in däm ganze Gfüeg wird si, dass ich de Choeun (Das isch dr Leiter vom Support Zentrum) Begleite und berote due. Dass ich cha für sini 4 Mitarbeiter und 3 Lehrling (Wo nöchst Wuche afönd) cha unterstütze und dassi das ganze Projäkt Supervise due. Das tönt für mi nach ere riise Challenge. Will die lütt sind au nid ufe Kopf gheit. Aber de Martin isch felsefescht devo überzügt, dassi genau das mitbring wo do bruucht wird. Vo däm här bini sicher, dass das guet chunnt.

Nöchst Wuche gangi mit em Choeun uff Malaysia e mögliche Gschäftspartner go bsueche. Das wird spannend, unter anderem will dr Choeun no nie mit em Flugi greist isch. Und Kuala Lumpur isch sicher au e super spannendi Stadt.

Ich mäld mi denn widr wenni zrugg bi. Hebets guet.