Wow! und Back home

Written by chris on August 13th, 2010

Rumpeldi bumm und donnerchlapf seit doch de Riis Grochsi bim Chasperli. Jäwoll do bini widr. Bi zrugg. Und das nid ganz ohni Action. Also zerscht hani in Züri e Schwizer Missionarsfamilie vo Phnom Penh aatroffe, wo uffe Glych Flug gange isch. Das isch e riise Zuefall gsi. Vo de 2 Freie Plätz im Flugzüg isch de einti grad näbe mir gsi. Sehr agnäm. Das heisst zwüscheduure hani sogar chönne liige, das isch mer bis jetzt au no nie passiert.
An de Gränze händ si mi Koffer welle aaluege. sehr unagnäm, will mi Gepäck isch gfüllt gsi mit 2 Notebooks, 2 Netbooks und öppe 5 Kilo PC Material. Hehe, är hett also moll die erschte 2 Boxene usezoge und hett gfunde, das sig neu, das muessi verzelle. Ych ha denn also mi beschts Khmer füregholt (und das isch kei sälbstverständlichkeit nach 2 Wuche kei Khmer) und hanem erklärt, dass das Material zum Unterrichte und nid zum verkaufe isch. Är hett mi denn ins Rümli bstellt und hett mi gfroggt wievill denn die sache kostet händ. Es hetten nur interessiert was är in de Hand gha hett. De Ganz Koffer wär jo voll gsi ;) hanem denn erklärt, dassi das nid weiss, das sige Gschänk vo Fründe zum do in Kambodscha z’Unterstütze. Eigendlich hani dänggt, dasser jetzt denn sich e Betrag ussdänggt woni muess zahle, aber dem war nicht so. Nachdäm ich ihm none Accesspoint zeigt ha wo völlig verkratzt gsi isch zum em zeige “lueg das Zügs isch nid neu, ich will das do nid verkaufe” hetter mi lo springe. Sini Mitarbeiterin hett mir sogar no gholfe iipacke. Ha gmeint ich trau mine auge nid. Aber das isch moll e suubere Iistand gsi und mi Khmer hani super unter Bewiis chönne stelle ;)
Bim Aacho hani denn moll e suubere Kultur Shock gha. Es isch komisch gsi, will irgendwie isch alles so fremd do, aber ych ha jo alles scho kennt. Ha denn 2 Täg bruucht zum realisiere, dassi doch gar nid so lang wäg gsi bi. Aber jetzt bini widr voll do.
Mit ROOT IT isch voll action aagseit. S’Business lauft guet. Si verkaufe im Momänt rächt vill (verhältnismässig), d’Uniforme wo si kriegt händ gsend immerno super uss. S’schönschte isch, dass si die Sache woni ihne biibrocht ha wirklich am umsetze sind. Jede Kund hett e Ordner mit allne Informatione über d’IT Infrastruktur dörte.
Am Mäntig gangi uff Siem Riep uffe zum däm andere WEC Projäkt go hälfe s’Büro zügle. Spiil mit de Kinder ligge leider nid dinne, will durch de villi Räge isch alles sehr sumpfig dört. Do sind d’Temperature übrigens de Hit. Immer so knapp unter 30 Grad und zoobe schön unter 25. So losst sichs wunderbar läbe.

Hey ich ha die 2 Wuche in de Schwiz mega gnosse. Ich bi überwältigt gsi vo däm riisige Interässe wo mir entgege brocht worde isch. Ich hätt das nie molls in däm Ussmass erwartet. Ha mi über jedi Begegnig, jedes zmorge, zmittag oder znacht gfreut. Mir sind die 2 Wuche extrem lang iinecho, aber das isch positiv gmeint.
Au dass so vill lütt nomoll ans Abschlussfestli cho sind. Es isch de Hammer zwüsse, dass so vill Lütt hinter mir stönd. Das gitt mir sehr Muet in Zyte woni do am zwyyfle bi.

PS: Falls sich öpper Beruefe fühlt, S’Personal Büro suecht nach emne Velominister. Es handlet sich do ume Festaastellig vo mindestens 5 Mönet. S’Budget liggt bi CHF 30.- Pro Monet. Bi Interässe mäld di doch bi minere Finanzverwalterin oder wunderbare Schwösterli: olivia@chrisincambodja.ch

E wunderschöns Bruttpaar

 

Leave a Comment